Մազաթափությունը ցուրտ եղանակին

ՀԱՐՑ: Արդեն երեք տարի շարունակ ինձ մոտ ձմռան ամիսներին մազաթափություն է սկսվում: Բժիշկը վիտամինային կուրս է նշանակել, սակայն դա չի օգնում:

ՊԱՏԱՍԽԱՆ: Մազաթափությունը նորմալ երևույթ է։ Խնդիրը թափվող մազերի քանակն է. օրական մինչև 150 մազը համարվում է նորմալ: Ձմռանը մազերը թուլանում են ու կարող են թափվել ավելի շատ: 

Իսկ եթե խնդիրն իրոք լուրջ է (դու զգում ես, որ օրվա ընթացքում կորցնում ես 150-200 մազից ավելի), ապա պետք է հասկանալ պատճառները, որոնք կարող են լինել ինչպես արտաքին (սնկային հիվանդություն, պսորիազ, դերմատիտ), այնպես էլ ներքին` կապված որևէ օրգանի աշխատանքի խանգարման հետ: Պատճառը պարզելու համար անհրաժեշտ է խորհրդակցել մաշկաբան տրիխոլոգի հետ: Նա կարող է նշանակել ֆիզիոթերապիա, լազերային սանր կամ մեզոթերապիա:

Եթե պատճառը ներքին խանգարումն է, ապա հարկավոր է անցնել ամբողջական զննում, ստուգել վահանաձև գեղձի, մակերիկամների աշխատանքը, պարզել հորմոնային ֆոնը (իգական և արական սեռական հորմոնների քանակն օրգանիզմում): Եթե դաշտանի ընթացքում մազաթափությունն ուժեղանում է, ապա պետք է ուշադրություն դարձնել ձվարանների աշխատանքին, ինչպես նաև՝ ստուգել աղիները: Գուցե գլխուղեղի ստուգում անցնելու և նյարդային համակարգի աշխատանքը կարգավորելու անհրաժեշտություն առաջանա. մազաթափությունը կարող է ուղղակիորեն կապված լինել նյարդային լարման հետ: Ամեն դեպքում, սկսիր մաշկաբան-տրիխոլոգին այցելելուց:

Հարցեր, պատասխաններ, մեկնաբանություններ